Հերթը Մանե Միսակյանի հարցինն է։
Բացահայտվել են «ընկնող աստղերի» ինքնությունը։😎
Իհարկե, դա բացահայտվել էր դեռ շատ վաղուց, բայց եկեք անդրադառնանք այդ հարցին։ )
Ի՞նչ ասել է «աստղ է ընկնում» և ի՞նչ է իրականում ընկնում։
Բարեբախտաբար այդ երկնային հրավառության ժամանակ աստղեր չեն ընկնում։ Աստղերը մեր ջերմատու-լուսատու Արեգակի չափերն ունեն, պատկերացնո՞ւմ եք՝ ինչ կլիներ մեզ հետ, եթե ինչ-որ «հրաշքով» աստղ ընկներ Երկրի վրա։ Նույնիսկ չէինք հասցնի պատկերացնել։🙃
«Ընկնող աստղերն» իրականում երկնաքարեր են, որոնք մթնոլորտի հետ շփման արդյուքում բռնկվում են և ընկնող աստղի տպավորություն ստեղծում։ Հսկայական արագությամբ՝ վայրկյանում մինչև 50 կիլոմետր կամ ավելի, անցնելով Երկրի մթնոլորտի միջով՝ նրանք հարվածում են օդի մասնիկներին և ուժեղ դիմադրություն են զգում: Արդյունքում, արդեն մոտ 120 – 150 կմ բարձրության վրա նրանք տաքանում ու հասնում են մինչև մի քանի հազար աստիճան ջերմաստիճանի և վերածվում շիկացած գազի՝ արագ ցրվելով օդում։ Նրանք կարծես այրվում են օդում Երկրից 50-80 կմ բարձրության վրա։
Այդպիսի երկնաքարեր կարելի է տեսնել ամեն պարզ գիշեր, պարզապես պետք է որոշ ժամանակ նայել երկնքի որոշակի հատվածի։ Սակայն լինում են ժամանակահատվածներ, երբ այդ երևույթն առավել ակտիվանում է, այսպես կոչված աստղային անձրևներ են տեղում։
Օրինակ, ամեն տարի օգոստոսին դիտվում է Պերսեիդների աստղաթափը, որին քաջ տեղյակ կլինեն հատկապես մեր հետևորդներ, շատերդ էլ նույնիսկ մասնակցել եք արդեն ավանդույթ դարձած աստղաթափի աստրոտուրերին։
![Կադր՝ Պերսերիդների մեր աստրոտուրից](https://t3807456.p.clickup-attachments.com/t3807456/726c3da3-301b-4994-bda0-c370a91450df/367707403_805122064952350_7001136689647243389_n%20(1).jpg)
Դրանց մեծ մասը դիտվում է հատկապես օգոստոսի 11-12-ին։ Այդ օրերին կարող եք հաշվել ժամում մինչև 100 երկնաքար:
Հետաքրքիր փաստ Պերսեիդների մասին։ Եթե 1-2 ժամ ուշադիր նայեք երկնքին, կնկատեք երկնաքարերը կարծես դուրս են գալիս ինչ-որ կետից և գծի տեսքով ցրվում տարբեր ուղղություններով, ու եթե երկնքում տեսանելի երկնաքարերի ուղիները գծագրվեն աստղային քարտեզի վրա և գծերը նույն ուղղությամբ շարունակվեն, դրանք բոլորը կհատվեն մեկ կետում, որը գտնվում է Պերսեիդ համաստեղությունում։ Այստեղից էլ այդ աստղաթափի անվանումը։
![Պերսեիդների աստղաթափ](https://t3807456.p.clickup-attachments.com/t3807456/eb993b39-c4af-473b-9bc4-b80655f71e80/image.png)
Արդեն հասկացանք, որ ընկնող աստղեր չկան, այլ դրանք երկնաքարեր են։ Իսկ ինչպե՞ս են դրանք հայտնվում մեր մթնոլորտում։
Միջմոլորակային տարածությունում կան փոքր մասնիկների՝ երկնաքարերի հոսքեր, որոնք, ինչպես Երկիրը և մյուս բոլոր մոլորակները, որոշակի ուղեծրերով պտտվում են Արեգակի շուրջը։ Այդպիսով, երբ Երկիրն իր շարժման ընթացքում հատում է ցանկացած հոսքի ուղեծիր, նա հանդիպում է այդ հոսքի մասնիկներին՝ երկնաքարերին, և դիտվում է աստղաթափ։ Օրինակ, ամեն տարի օգոստոսի 11-12-ին Երկիրն անցնում է ադպիսի մի հոսքի ամենախիտ մասով, և մենք ականատեսն ենք լինում Պերսեիդների աստղաթափին։
Եվ վերջում, չնայած նրան, որ ոչ թե աստղ է ընկնում, այլ երկնաքար, միևնույն է մի դադարեք երազանք պահել։ ✨